Norðfjarðarhöfn

Norðfjarðarhöfn er ein stærsta fiskihöfn landsins. Hafnarsvæðið skiptist upp í aðalhöfn annars vegar, innst í firðinum, og hins vegar eru bryggjur í miðbæ Neskaupstaðar. Í aðalhöfninni eru Togarabryggja, Löndunarbryggja, Olíubryggja, Netagerðarbryggja og smábátahöfn. Bryggjur miðbæjarins eru Bæjarbryggja og Gamla bæjarbryggjan. Sú fyrrnefnda er stálþil og þjónar aðallega sem viðlega, en einnig hafa minni skemmtiferðaskip haft þar viðkomu. Gamla bæjarbryggjan er hluti af Safnahúsinu í Neskaupstað og þjónar þessi skemmtilega trébryggja sem dorgveiði- og útsýnisbryggja. Miðja vegu á milli aðalhafnarinnar og Gömlu bæjarbryggjunnar er svo Gamla netagerðarbryggjan, sem þjónaði netaverkstæði sem var þarna staðsett. Starfræktur er fiskmarkaður á Norðfirði sem þjónustar aðallega smábátum sem þar landa. 

Hafnarvog er staðsett við höfnina í Neskaupstað, þar er bæði pallavog og bílavog.